ఆయుర్వేదం ప్రకారం మహావ్యాధులు వాటి ఉపద్రవాలు

 

        ఆయుర్వేదం ప్రకారం మహావ్యాధులు మొత్తం ఎనిమిది రకాలు . అవి

*  వాతవ్యాధి .

*  ప్రమేహము .

*  కుష్ఠు రోగం .

*  ఆర్శ రోగం .

*  భగంధరం .

*  అశ్మరి రోగం .

*  ఉదరవ్యాధి.

*  మూఢ గర్భము .

        అను ఈ ఎనిమిది వ్యాధులు అసాధ్యములై చికిత్స చేయుటకు కష్టముగా ఉండునట్టి మహావ్యాధులని పేర్కొనబడినది.

  అసాధ్య రోగ లక్షణాలు -

      ఇప్పుడు చెప్పబోవు లక్షణాలు అన్నియు ఒకేసారి ఏ వ్యాధినందైనా కనిపించిన ఆ వ్యాధికి చికిత్స చేసినను ప్రయోజనం ఉండదు.   అవి

*  శరీరం నందలి మాంసం క్షీణించుట.

*   శరీరం చచ్చుబడిపోవుట.

*  దప్పిక.

*  వాంతులు .

*  జ్వరం.

*  అతిసారం.

*  సృహ తప్పిపడిపోవుట.

*  ఎక్కిళ్లు .

*  ఆయాసం .

          పైన చెప్పిన ఉపద్రవాలు ఏ మూడైనను ఒకేసారి కలిగి ఉన్న ఆ వ్యాధి చికిత్సకు లొంగదు. కావున ఆ రోగికి చికిత్స చేసినను ప్రయోజనం లేదు .

*  వాతవ్యాధి వలన కలుగు ఉపద్రవములు -

     చర్మముకు స్పర్శజ్ఞానం లేకపోవుట , వణుకు, కడుపుబ్బరం, లోజ్వరం, శరీర భాగముల యందు బాధగా ఉండటం , వాతవ్యాధి గల వాని ఎముకలు విరుగుట  , ఎముకలు చిట్లుట వంటి సమస్యలు కలిగినచో ఆ వ్యాధి ఆ రోగిని నశింపచేయును .

*  ప్రమేహ వ్యాధి వలన కలుగు ఉపద్రవములు

      శ్లేష్మం ప్రధానమగు ప్రమేహ రోగి యొక్క శరీరం నందు ఈగలు ముసురుచుండును. పిత్తప్రమేహ రోగికి వృషణాలు వాచి ఉండును. వాత సంబంధమైన ప్రమేహరోగికి అధికంగా , ఎక్కువ సార్లు మూత్రం బయటకి వెడలును.  కొన్నిసార్లు ఈ ప్రమేహం వలన వ్రణాలు కూడా కలుగును. ఇవి ప్రాణానికి హాని చేయును .

*  కుష్టువ్యాధి వలన కలుగు ఉపద్రవములు -

       శరీరం చిట్లి నీరుకారుట, కళ్లు ఎర్రబడుట, కంఠస్వరం క్షీణించుట వంటి లక్షణాలు కలిగిన కుష్టురోగిని ఆ వ్యాధి నశింపచేయును.

*  ఆర్శరోగం వలన కలుగు ఉపద్రవములు -

        ఈ రోగమునకు సాధారణ బాషలో మొలలు అని మరొకపేరు కలదు.  దీనిలో కలుగు ఉపద్రవములు  దప్పిక, నోరు రుచి లేకుండా పోవటం ,శూల, అధికరక్తస్రావం , ఉబ్బు , అతిసారం వీటితో కూడుకొనియున్న ఆ ఆర్శరోగం రోగిని నశింపచేయును .

*  భగంధరం వలన కలుగు ఉపద్రవములు -

         ఈ రోగమును ఆంగ్లము నందు "ఫిస్టులా" అని పిలుస్తారు . దీనిలో కలుగు ఉపద్రవములు మలమూత్రములు, క్రిములు , శుక్రము, భగంధర వ్రణము నుండి స్రవించినచో అట్టిరోగికి చికిత్స చేయకుండా విడవలెను . దీనికి రసాయన ఔషధ సేవనయే శరణ్యం.

*  మూత్రాశ్మరీ రోగం వలన కలుగు ఉపద్రవములు  -

            మూత్రము రాకపోవుట, బాధ కలుగుట,బొడ్డు మరియు వృషణాల యందు వాపు , పంచదార వలే , ఇసుక వలే మూత్రం రావటం వంటి లక్షణాలు ఉన్న మూత్రాశ్మరీ రోగం ఆ రోగిని తప్పక చంపును.

*  ఉదరరోగం వలన కలుగు ఉపద్రవములు -

          పార్శ్వములు పగిలిపోవునంత బాధ , అన్నద్వేషము , ఉబ్బు , అతిసార విరేచనాలు , విరేచన మార్గము ద్వారా నీరు తొలగించినను మరలా ఉదరం నీటితో నిండినట్లు ఉండటం వంటి లక్షణాలు కనిపించిన ఆ రోగికి చికిత్స చేయుట వ్యర్థం .

*  అతిసార రోగం వలన కలుగు ఉపద్రవములు  -

         ఆయాసం , శూల, దప్పిక కలిసి శరీరం క్షీణించిన వారికి , జ్వరముచే ఎల్లప్పుడూ పీడింపబడువానికి , దోషములు అధికంగా కలుగువానికి అతిసారవ్యాధి రోగిని నశింపచేయును .

*  రాజయక్ష్మ రోగం వలన కలుగు ఉపద్రవములు -

         కళ్లు తెల్లబడుట, అన్నద్వేషము , ఊర్ద్వశ్వాసతో భాధపడుట, మలము అతికష్టముగా వెడలుట, మలము అధికంగా వెడలుట అను లక్షణాలు ఈ క్షయ వ్యాధి కలిగిన రోగిలో కనిపించిన ఆ వ్యాధి ఆ రోగిని చంపును.

*  గుల్మ రోగం వలన కలుగు ఉపద్రవములు -

          ఆయాసం , శూల, దప్పిక, అన్నద్వేషం,  శరీరం పైన గడ్డలు కదలకుండా గట్టిగా ఉండటం వంటి లక్షణాలు కలిగిన గుల్మ రోగం ఆ రోగిని చంపును.

*  విద్రది ఉపద్రవములు -

         కడుపుబ్బరం, వాంతులు , ఎక్కిళ్లు , దప్పిక, ఆయాసం , కలిగిన విద్రది రోగి నశించును .

*  పాండురోగ ఉపద్రవములు -

         తెల్లని దంతములు, గోళ్లు కలిగి పూర్తిగా తెల్లగా పాలిపోయి తెల్లని వస్తు సమూహంగా కనిపించుచుంటాడో ఆ పాండురోగగ్రస్తునికి మరణం తప్పదు.

*  రక్తపిత్త వ్యాధి వలన కలుగు ఉపద్రవములు

         తరచుగా రక్తం వాంతి చేసుకోవడం , కళ్లు ఎర్రగా ఉండి చూసే వస్తువు ఎర్రగా కనపడునట్టి రోగి బ్రతుకుట అసాధ్యం .

*  ఉన్మాదం వలన కలుగు ఉపద్రవములు -

         శరీరం నందలి మాంసం , బలం తగ్గి నిద్రపోకుండా ఉండటం , ముఖమును క్రిందికిగాని , పైకిగాని పెట్టి మంచిచెడులు తెలుసుకోలేని స్థితిలో ఉన్న ఉన్మాదరోగి నశించును.

*  అపస్మార రోగం వలన కలుగు ఉపద్రవములు -

        తరచుగా సృహతప్పుట, శరీరం మిక్కిలి క్షీణించి కనుబొమ్మలు కదిలించుచూ కళ్లు వికృతిని పొందిన అపస్మార రోగి మరణించును.

*  జ్వరం వలన కలుగు ఉపద్రవములు  -

        మాటిమాటికి మూర్ఛపోవుట, సృహలేకుండా ఉండటం, శరీరం చల్లబడుట,లోజ్వరం కలుగుట,అటుఇటు కదలకుండా మొద్దులా పడి ఉన్న జ్వరరోగి మరణించును. అదేవిధంగా ఎక్కిళ్లు , ఆయాసం , ఎల్లప్పుడూ నిట్టూర్పూ విడుచుట, శరీరం క్షీణించుట వంటి లక్షణాలు కలిగి ఉన్ననూ ఆ జ్వరరోగి మరణించును.

        పైన చెప్పబడిన లక్షణాలు ముఖ్యంగా వ్యాధి పూర్తిగా ముదిరిపోయినప్పుడు కనిపించును. మూడగర్భము పూర్తిగా గర్భాశయ సంబంధ వ్యాధి . దానిగురించి కూడా తరవాతి పోస్టులలో వివరిస్తాను. 

  
గమనిక  -

      నేను రాసిన " ప్రాచీన ఆయుర్వేద ఔషధాలు " మరియు " ఆయుర్వేద మూలికా రహస్యాలు " రెండు గ్రంథాలలో ఎన్నొ రహస్య చిట్కాలు , మా కుటుంబపరంగా  గత 250 సంవత్సరాల నుంచి మా పెద్దవారు మాకు అందించిన ఎంతో అనుభవసారాన్ని ఈ గ్రంథాలలో అందరి అర్థం అయ్యే విధంగా సామాన్య బాషలో వివరించాను. ఇంట్లో ఉండి మరియు అందుబాటులో ఉన్న వాటితోనే పెద్ద పెద్ద రోగాలు నయం చేసుకునే విధంగా అత్యంత సులభయోగాలు మన ప్రాచీన భారతీయులు రచించిన చెట్లను బట్టి భూమిలో నీటిని కనుక్కునే విధానాలు , వృక్షాలకు ఆయుర్వేద మూలికల ఉపయోగించి దిగుబడి పెంచే వృక్షాయుర్వేద చిట్కాలు , రైతులకు ఉపయోగపడే విధంగా ఏయే నక్షత్రాలలో పంటలు వేస్తే ఫలితాల ఎక్కువుగా ఉంటాయో తిథి, నక్షత్ర, వారాలతో సహా ఇవ్వడం జరిగింది. ఆయుర్వేదం నేర్చుకోవాలి అనుకునేవారికి ఇది మంచి దిక్సూచిలా ఉపయోగపడును. ఈ గ్రంథాలలో మొక్కలను సులభముగ గుర్తించుటకు మొక్కల చిత్రాలు రంగులలో ఇవ్వడం జరిగింది.

      ప్రాచీన ఆయుర్వేద ఔషధాలు గ్రంథం 288 పేజీలు ఉంటుంది .వెల  - 350 రూపాయలు .

      ఆయుర్వేద మూలికా రహస్యాలు గ్రంథం 384    పేజీలు ఉంటుంది. వెల - 450 రూపాయలు  కొరియర్ చార్జీలు కలుపుకొని

        ఈ గ్రంథాలు కావలసినవారు డైరెక్టుగా ఫొన్ చేయండి  . సంప్రదించవలసిన నెంబర్
                  
                        9885030034

         మెస్సేజిస్ , కామెంట్ల రూపంలో పెట్టవద్దు .

                  కాళహస్తి వేంకటేశ్వరరావు .

              అనువంశిక ఆయుర్వేద వైద్యులు .

                          9885030034